महिला भलिबल तेस्रो साता

शेरबहादुर खड्का स्मृति प्रतिष्ठानले जेठ २३ गतेदेखि तेस्रो राष्ट्रिय महिला भलिबल गर्ने भएको छ ।
जेठ २६ सम्म हुने प्रतियोगितामा ६ टोलीको सहभागिता रहने प्रतिष्ठानका अध्यक्ष रञ्जन खड्काले बताए । उनका अनुसार गत वर्षभन्दा पुरस्कारको राशि दोब्बर बनाइएको छ । त्रिपुरेश्वरस्थित कभर्डहलमा हुने प्रतियोगिता विजेताले एक लाख ५० हजार, उपविजेताले ७५ हजार र तेस्रो हुने टिमले ५० हजार रुपैयाँ पुरस्कार जित्ने छन् ।

लिगकम नकआउटका आधारमा हुने प्रतियोगितामा डिफेन्डिङ च्याम्पियन एपीएफ क्लब, उपविजेता न्यु डायमन्ड एकेडेमी, नेपाल पुलिस क्लब, पश्चिमाञ्चल भलिबल संघ, त्रिभुवन आर्मी क्लब र जावलाखेल भलिबल प्रशिक्षण केन्द्रले भाग लिने छन् ।

स्पर्धालाई बहुराष्ट्रिय रंग कम्पनी केएनपी जापान प्रालिको साथ रहनेछ । सर्वोकृष्ट खेलाडीले १५ हजारसाथै एयर एसियाबाट काठमाडौं–मलेसिया–काठमाडौंको हवाई टिकट पाउने छन् । विधागत उत्कृष्टमा स्पाइकर, क्वीकर, सेटर, ब्लकर, डिफेन्स र सर्भर पुरस्कृत हुनेछन् । उत्कृष्ट सबैले जनही ३ हजार पाउने छन् । उत्कृष्ट प्रशिक्षक र राइजिङ प्लेयर चुन्नुका साथै एक खेलाडीलाई स्पेसल अवार्डबाट पनि सम्मानित गरिने भएको छ ।