वैशाख २१, २०७४( अल्ट्रा धावक भीम गुरुङले स्काइरनर वर्ल्ड सिरिजअन्तर्गत चीनको सिचुआनमा भएको ‘येदिङ स्काइरन’ को उपाधि रक्षा गरेका छन् । उनले तीन घण्टा ६ मिनेट ५१ सेकेन्डमा २९ किमि पूरा गर्दै मंगलबार स्वर्णपदक हात पारेका हुन् ।
स्काइरनर वर्ल्ड सिरिजको रेसमा उपाधि रक्षा गर्ने उनी पहिलो नेपाली धावक हुन् । स्काइरनर वर्ल्ड सिरिजमा यो उनको तेस्रो उपाधि हो । उनले गत वर्ष इटालीमा भएको ट्रोफियो किमामा पनि स्वर्ण जितेका थिए । तेन्जिङ–हिलारी एभरेस्ट म्याराथन (सन् २०१५) मा पनि च्याम्पियन भएका उनले ६ प्रतिष्ठित रेसमा स्वर्ण जितेका छन् ।
नेपाली सेनामा आवद्ध भीमले यसपालि येदिङमा चीनका एन्डी वाकरलाई १ मिनेट ३२ सकेन्डले पछाडि पार्दै स्वर्ण हात पारेका हुन् । समुद्री सतहबाट ४ हजार ६ सय मिटरसम्म कोर्समा आयोजित उक्त रेस १ सय ३२ धावकले पूरा गरेका थिए । उनले २ हजार अमेरिकी डलर पुरस्कार प्राप्त गरे ।
१३ वर्षयता साहसिक दौडमा सहभागी हुँदै आएका गोरखाका भीमले गत वर्ष ३ घण्टा २० मिनेट ३० सेकेन्डमा दौड पूरा गर्दै अविश्वसनीय रूपमा स्वर्ण जितेका थिए । उनी चैतमा युरोपमा भएको नर्थ–पोल म्याराथन (विश्वकै चिसो स्थानमा हुने दौड) मा दोस्रो भएका थिए ।
उनीसहित येदिङमा तीन नेपाली धावक सहभागी थिए । सुनमाया बूढा ४ घण्टा २९ मिनेट ८ सेकेन्डसाथ महिलातर्फ चौथोमा रहिन् भने पूर्णलक्ष्मी नेउपाने (४ घण्टा ३३ मिनेट ४६ सेकेन्ड) पाँचौं भइन् ।
अमेरिकी धाविका मेगन किमेलले पनि लगातार दोस्रोपल्ट महिलातर्फको स्वर्ण पदक हात पारिन् । उनले ३ घण्टा ३३ मिनेट ५५ सेकेन्ड लगाइन् । महिलातर्फ ७५ जनाले दौड पूरा गरेका थिए ।
